"Gera má ráð fyrir að veiðar og vinnsla sjávarafurða muni áfram skila Íslendingum hvað mestum verðamætum í þeim efnahagsþrengingum sem þjóðin stendur frammi fyrir um þessar mundir.

Niðurskurðurinn sem þegar hefur verið ákveðinn mun bitna harðast á atvinnuöryggi fiskverkafólks og sjómanna og eru merki þess þegar farin að gera vart við sig. En ljóst má vera að við óbreytt ástand munu fiskvinnslur í auknum mæli grípa til þess ráðs að loka í enn lengri tíma en áður hefur tíðkast. Það mun leiða til enn frekara óöryggis hjá fiskverkafólki og sjómönnum sem um þessar mundir skapa þjóðarbúinu hvað mest verðmæti.

Stjórnvöldum ber skylda til að koma í veg fyrir að þær aðstæður skapist. Ein af leiðunum til þess að svo verði ekki er að auka aflaheimildir, sem og takmarka útfluttning af óunnum afla.

Stjórn Verkalýðsfélags Vestfirðinga skorar því á Alþingismenn að ganga fram af festu og auka aflaheimildir nú þegar. "

Stjórn Verkalýðsfélags Vestfirðinga lýsir yfir þungum áhyggjum og sendir frá sér eftirfarandi ályktun vegna fyrirhugaðrar þjónustuskerðingar Breiðafjarðarferjunnar Baldurs.

"Ferðir ferjunnar Baldurs eru samfélaginu á sunnanverðum Vestfjörðum lífsnauðsynlegar. Samkeppnisstaða svæðisins verður stórlega skekkt gagnvart öðrum landshlutum ef dregið verður úr daglegum ferðum.  Má í því samhengi nefna, að fiskútflutningsfyrirtæki hafa á síðustu árum byggt upp verðmæt viðskiptasambönd sem nú er hætta á að fari forgörðum ef daglegar ferjusiglingar verða ekki tryggðar áfram.

Skerðing af þessu tagi leiðir til ótryggara atvinnuástands hjá íbúum byggðarlaga sem byggja nánast allt sitt á vinnslu og veiðum sjávarfangs, fyrir utan að hafa jafnvel bein áhrif á íbúaþróun með neikvæðum hætti.  Þá gegnir Ferjan Baldur einnig lykilhlutverki í samgöngum vegna reksturs framhaldsdeildar á Patreksfirði undir stjórn Framhaldsskóla Snæfellinga í Grundarfirði.

Á meðan ástand vegamála á svæðinu er svo dapurlegt sem raun ber vitni, er einfaldlega ekki hægt að bjóða fólkinu og atvinnulífinu á suðurfjörðunum upp á það að skerða þjónustu Baldurs. Hið skelfilega ástand veganna og fyrirhuguð skerðing á vetrarþjónustu gerir það að verkum að á þá flutningsleið er ekki hægt að treysta.

Í ljósi þessa skorar stjórn Verkalýðsfélags Vestfirðinga eindregið á samgönguráðherra að fallið verði frá þessum áformum og íbúum suðursvæðis Vestfjarða  verði áfram tryggð þjónusta  með daglegum siglingum Baldurs yfir Breiðafjörð."

Allt of mikilli orku Alþingis hefur verið eytt í þref um lausn Icesavefrumvarpsins, á meðan hafa mál sem snúa að atvinnulífi og heimilum landsmanna verið látin sitja á hakanum. Eigi Stöðugleikasáttmáli aðila vinnumarkaðrins að halda, er nauðsynlegt að unnið verði að lausnum þrátt fyrir að þing hafi nú verið rofið. Á meðan ekkert er að gert eykst vandi skuldsettra heimila og fyrirtækjum í landinu blæðir út.

 

Leiða má að því líkum í óbreyttri stöðu þá muni fyrirtæki  þurfa að grípa til þeirra neyðarúrræða að draga enn frekar saman í rekstri. Afleiðingarnar yrðu uppsagnir starfsfólks í meiri mæli en áður hefur verið.  Til að koma í veg fyrir slíkt þurfa stýrivextir Seðlabanka að lækka niður í 3 - 5% sem fyrst. Verðtryggingu á húsnæðislánum þarf að frysta tímabundið, eða afnema með öllu.

 

Verkalýðhreyfingin hefur marg oft bent á hve ómarkvissar og seinvirkar aðgerðir sem gripið hefur verið til af hálfu ríkisvaldsins væru. Í því samhengi er tekið undir ályktun miðstjórnar ASÍ frá 26. ágúst síðast liðinn um greiðsluvanda heimila. Það skilar engu að draga lappirnar í doða og aðgerðarleysi, áræðni og þor til framkvæmda er atvinnu og efnahagslífi okkar nauðsynlegt.

 

Sparnaður, niðurskurður og aðhaldsaðgerðir eiga ekki að vera einkunarorð þegar byggja þarf upp til framtíðar. Botnfrosið hagkerfi skilar okkur ekki öðru en gjaldþrotahrynu heimila og fyrirtækja. Snúum vörn í sókn með sameiginlegu átaki verkalýðshreyfingarinnar, vinnumarkaðarins og Alþingis."

Aðalfundur Verkalýðsfélags Vestfirðinga  23. maí 2009 beinir þeim eindregnu tilmælum til forseta ASÍ að beita sér af fullum þunga fyrir því að kjör lágtekjufólks verði varin með öllum hugsanlegum ráðum í viðræðum um endurskoðun kjarasamninga sem fram fara um þessar mundir.

 

Eigi árangur þess samkomulags sem nú er undir að verða stöðugleiki og sátt,  þá verða þeir sem hærri hafa tekjurnar að taka á sig stærri hluta byrðanna.  Það verður að hafa algjöran forgang að eyða þeim ójöfnuði sem ríkir í þjóðfélaginu í dag.  Höfum slagorð 1. maí að leiðarljósi og tökum öll þátt í að byggja réttlátt þjóðfélag.

"Stjórnarfundur Verkalýðsfélags Vestfirðinga haldinn á Bíldudal 16. maí 2009 tekur undir ályktun málþings "Sókn í eflingu atvinnulífs á suðursvæði Vestfjarða" frá 5. maí sl.  Engin sanngirni felst í því að þau landssvæði sem tóku á sig mikinn skell vegna ofþenslu síðustu ára þurfi að taka á sig enn frekari skell vegna þeirrar kreppu sem nú dynur á heimilum landsmanna. Fundurinn beinir þeim tilmælum til Alþingis að horfa sérstaklega til þeirra sóknarfæra sem felast í atvinnuuppbyggingu á landsbyggðinni bæði í sjávarútvegi og landbúnaði.

 

Fundurinn krefst þess að stjórnvöld geri stórátak í jöfnun raforku- og flutningskostnaðar sem og standa við fyrri hugmyndir um flutning opinberra starfa til landsbyggðarinnar.  Þá verði átak í samgöngumálum Vestfirðinga sett í algjöran forgang, þannig að heilsárstenging suður- og norðursvæðis verði að veruleika sem fyrst.  Í þeim málum eru vestfirskir vegir mörgum áratugum á eftir í uppbyggingu og þróun. Sú tenging mun skjóta styrkari stoðum og efla samvinnu og samstarf í atvinnumálum á norður- og suðursvæði Vestfjarða."