Formannafundur SGS sem haldinn var á Ísafirði 5. og 6. þ.m. samþykkti ályktun þar sem ríkisstjórnin er átalin fyrir hagstjórnarmistök sem stefna í hættu ávinningi kjarasamninga.  Á fundinum var kynnt félagsleg fræðsla á vegum MFA, launa- og kjarakönnun sem Gallup gerði fyrir sambandið og hagfræðngarnir Ólafur Darri Andrason hjá ASÍ og Guðmundur Ólafsson prófessor fluttu erindi og voru nokkuð á öndverðum meiði. Athyglisverðar niðurstöður komu fram í launa- og kjarakönnuninni. T.d. höfðu 75% þeirra sem fóru fram á launahækkun umfram kjarasamninga fengið hana, en aðeins rúml. 25% þeirra sem svöruðu höfðu farið fram á hækkun, þó aðeins 26% þeirra sem ekki reyndu það teldu sig hafa hæfileg laun. 30% þeirra sem ekki fóru fram á hækkun töldu það vonlaust, en 23% töldu sig ekki hafa stöðu til að biðja um hækkun. 
75% árangur þeirra sem reyndu gefur greinilega tilefni til að endurskoða þessa afstöðu.
60% sögðust hafa fundið fyrir vaxandi verðbólgu síðustu 6 mánuði. Könnunin leiddi í ljós að heildarlaun karla í fullu starfi voru 278 þús. en kvenna 187 þús.

Ályktun fundarins fer hér á eftir:

,,Fundur formanna aðildarfélaga Starfsgreinasambands Íslands haldinn 6. október 2006, lýsir yfir þungum áhyggjum af stöðu efnahags- og kjaramála. Verðbólga er mikil, vextir í sögulegum hæðum, gengi íslensku krónunnar hefur lækkað mikið frá áramótum og hagspár gera ráð fyrir litlum eða engum hagvexti á næsta ári. Við þessar aðstæður rýrnar kaupmáttur margra og aukin greiðslubyrði af lánum leggst þungt á skuldsett heimili.

Þetta er dapurleg staða fyrir íslenskt launafólk í lok eins mesta góðæris íslandssögunnar. Alvarleg mistök í hagstjórninni á liðnum árum hafa leitt til þess að þeir ávinningar sem yfirstandandi kjarasamningar áttu að tryggja launafólki hafa að stórum hluta glatast. Það er einnig dapurleg staðreynd að hagstjórnarmistökin hafa leitt til þess að atvinnulífið stendur ekki nægilega traustum fótum í lok hagsveiflunnar.

Formannafundurinn krefst þess að stjórnvöld geri það að forgagnsverkefni að koma á stöðugleika í íslensku efnahagslífi sem er forsenda þess, að hægt sé að byggja upp hagvöxt til lengri tíma, auka varanlegan kaupmátt launa og byggja upp góð störf til framtíðar."

Ályktun.

Stjórnarfundur Verk-Vest, haldinn á Reykhólum 9. sept. 2006, vill enn og ítrekað

vekja máls á því að bættar samgöngur eru ein af undirstöðunum til að tryggja og

viðhalda byggð í landinu. Eitt brýnasta verkefnið hvað varðar Vestfirði er að tengja

byggðir fjórðungsins með góðum vegum sem nýtast allt árið.

Barist hefur verið fyrir því að vegir á heiðum og hálsum, sem gjarnan eru tepptir

stóran hluta árs, verði færðir niður á láglendi, yfir firði og fyrir nes.

Ein af þeim hugmyndum er vegalagning í Barðastrandarsýslu, frá Melanesi yfir

Gufufjörð, Djúpafjörð og Þorskafjörð, u.þ.b. 15 km. leið og losna þar með við

hættulegan veg yfir Hjallaháls og Ódrjúgsháls.

Stjórnin tekur undir óskir heimamanna á Reykhólum um að þessi vegagerð, sem

Vegagerð ríkisins mælir með og kölluð er leið B, verði valin. Við verðum að treysta

því að við slíkar framkvæmdir sýni þeir sem verkið vinna fyllstu gát svo umhverfinu

verði ekki spillt, enda hefur vegagerðin sýnt í verkum sínum að hún er þess trausts

verð.

Samþykkt

Stjórnarfundur Verkalýðsfélags Vestfirðinga, haldinn á Drangsnesi 12.

ágúst 2006, mótmælir harðlega frestunum á vegaframkvæmdum sem

boðaðar hafa verið. Úrbætur á vegum sem liggja um Vestfirði hafa setið á

hakanum í áratugi og þeir eru í dag með þeim allra lélegustu sem finnast í

þróuðum löndum og er þá langt til jafnað.

Fundarmenn skora á þingmenn kjördæmisins að sjá til þess að

Vestfirðingar sem aðrir landsmenn geti ekið á vegum sem tíðkast í

þróuðum löndum. Malarvegir á Vestfjörðum standast ekki þær kröfur sem

gerðar eru til nútíma þjóðvega og uppfylltar hafa verið hjá öðrum. Góðar

samgöngur eru lífæð hverrar byggðar, bæði hvað varðar atvinnu og

menningu, sem og öryggi og þróun byggðar.

Það eru engin rök fyrir frestun t.d. á þverun Mjóafjarðar að

útboðsgögn séu ekki enn tilbúin. Samgönguráðherra og þingmenn okkar

ættu frekar að svara því hvers vegna útboðsgögnin eru ekki á borðinu, því

áratugur er síðan ákveðið var að fara í verkið.

Fundurinn vill taka fram að svipað ástand er einnig á norðausturhorni

landsins.

Verk-Vest hefur sent öllum alþingismönnum eftirfarandi samþykkt, sem inniheldur áskorun um að þeir beiti sér fyrir brýnu mannréttindamáli:

Stjórn Verkalýðsfélags Vestfirðinga lýsir megnri óánægju sinni með þá afstöðu félagsmálaráðherra Árna Magnússonar að ætla ekki að leggja til að Ísland fullgildi samþykkt Alþjóðavinnumálastofununarinnar (ILO) nr. 158. Þetta samsvarar yfirlýsingu um að Íslendingar skuli áfram búa við minna öryggi og sanngirni en aðrar þjóðir, sem þegar hafa fullgilt samþykktina eða búa við sambærileg eða betri réttindi í vinnulöggjöf.

Íslendingar geta ekki til lengdar búið við það óréttlæti að vinnuveitendur geti rekið menn úr vinnu, jafnvel eftir áralanga þjónustu, án þess að færa fyrir því nokkur rök. Mótbára vinnuveitenda um hindrun í sveigjanleika eru falsrök, drottnunarárátta er raunsannari lýsing.

Stjórnin skorar á alþingismenn að ganga fram fyrir skjöldu og flytja nú þegar frumvarp á Alþingi um fullgildingu á samþykkt ILO nr. 158.

Eftirfarandi ályktun var samþykkt á aðalfundi Verk-Vest þann 4. sept:

Aðalfundur Verkalýðsfélags Vestfirðinga haldinn 4. september 2005 mótmælir þeim vandræðum sem stjórnvöld hafa bakað vestfirsku atvinnulífi með efnahagsaðgerðum og risaframkvæmdum á Austurlandi og valdið hafa hruni í sjávarútvegi og vinnslu sjávarafla.

...
Meira