Nýtt trésmíðafyrirtæki sem leggur áherslu á smíði innréttinga og hurða hefur verið stofnað í Ísafirði, en starfsemin mun verða til húsa í húsnæði því sem hýsti áður starfsemi TH innréttinga. En eins og áður hefur komið fram hér á vefnum var starfsemi TH innréttinga úrskurðuð gjaldþrota rétt fyrir síðustu jól. Þeir sem að fyrirtækinu standa eru hoknir af reynslu í innréttingabrsansanum og munu kappkosta að þjónusta ekki síst Vestfriðinga sem og aðra landsmenn með vönduðum innréttingum og faglegri þjónustu. Hið nýja fyrirtæki mun áfram vera í samstarfi við Eldaskálann í Reykjavík um framleiðslu og sölu eldhúsinnréttinga líkt og TH inréttingar voru áður. Aðstandendur fyrirtækisins ætla að byrja hægt en bæta við mannskap eftir því sem verkefnastaða eykst. Það er von Verk Vest að vel gangi að afla verkefna hjá hinu nýja fyrirtæki og fljótlega verði hægt að ráða inn fleiri af fyrrverandi starfsmönnum TH innréttinga.

Ísbjörn ÍS-304 sem bættist í skipaflota okkar Vestfirðinga fyrir skömmu, kom í heimahöfn á Ísafirði síðdegis í gær. Skipið er um 1000 tonna frystiskip sem gert verður út til úthafsrækjuveiða frá Ísafirði. Ísbjörn ÍS er í eigu rækjuverksmiðjunnar Kampa á Ísafirði og útgerðarfélagsins Birnir ehf. í Bolungavík. En fyrir á útgerðarfélagið Birnir ehf. rækjutogarann Gunnbjörn ÍS og ísfisktogarann Valbjörn ÍS. Vonir standa til að skipið komist til veiða um miðjan mars, en ákveðið var að sigla því til Ísafjarðar og ljúka lokafrágangi á skipinu hér heima og tryggja þannig heimamönnum vinnu við endurbæturnar. Vonir standa til að skipið geti veitt hátt í 2000 tonn af rækju á ári sem hefur gríðarlega jákvæð áhrif á hráefnisöflun fyrir rækjuvinnslu Kampa. Haft er eftir stjórnarformanni Kampa að þetta mun laga hráefnisöflunarstöðu Kampa um 20-25% þannig að þörfin fyrir hráefniskaup verði minni. Koma skipsins mun einnig skapa fleiri störf fyrir sjómenn, en á svona skipi sem er úti þrjár vikur í senn eru tvær áhafnir þannig að gera má ráð fyrir 22-24 störfum í framtíðinni. Tryggari hráefnisöflun mun einnig skjóta styrkari stoðum undir starfsöryggi landverkafólks í rækjuvinnslu Kampa. Verkalýðsfélags Vestfirðinga færir áhöfn og eigendum árnaðaróskir og velfarnaðar með hið nýja skip.

Verk Vest beinir því til félagsmanna sinna sem starfa hjá sveitafélögum að fylgjast með hvort kjarasamningsbundin eingreiðsla hafi skilað sér með launagreiðslum þann 1. febrúar. En samkvæmt ákvæði greinar 1.2.2 í kjarasamningi SGS við Launanefnd sveitafélaga eiga starfsmenn þeirra að fá sérstaka eingreiðslu kr. 25.000 miða við fullt starf. Starfsmenn í hlutastarfi fá greitt hlutfallslega miðað við starfshlutfall 1. febrúar 2012.

Þann 1. febrúar munu útgefnir launataxtar Verk Vest hækka um kr.11.000. Þá munu almennar launahækkanir til þeirra sem ekki fá laun samkvæmt útgefnum launatöxtum hækka um 3,5% að lágmarki. Reiknitölur og föst álög eins og t.d. fastur bónus í rækjuvinnslu munu einnig hækka um 3,5% en þó ekki minna en 10 krónur. Þetta þýðir að allur fastur bónus undir kr. 288 pr/klst hækkar um 10 krónur. Fatapeningar hækka einnig og verða kr. 10,87 pr./klst. í almennri fiskvinnslu, en kr.12,42 í saltfisk- og skreiðarvinnslu. Lágmarkstekjur fyrir fullt starf hækka einnig og verða kr.193.000 fyrir 173,33 stundir í mánuði eða 40 klst. á viku. Þeir sem ekki ná kr.193.000 á mánuði fyrir fullt starf ( 173,33 stundir + bónus + álagsgreiðslur innan dagvinnutíma ) skulu fá greiddar launauppbætur fyrir það sem upp á vantar. Laun beitningamanna hækka einnig og greiðast kr. 2.797 án orlofs að lágmarki fyrir 500 króka bala og kr. 3.020 án orlofs að lágmarki fyrir 540 króka bala. Lágmarkskauptrygging beitningamanna verður kr.215.345 að lágmarki frá 1.febrúar.

Unnið er að uppfærslu útgefinna launataxta á síðu Verk Vest en á meðan er hægt að nálgast launataxta Starfsgreinasambands Íslands hér.

Mikil undiralda reiði samninganefnda aðildarfélaga ASÍ í garð svikinna loforða ríkisstjórnarinnar einkennir ályktanir sem aðildarrfélögin hafa verið að senda frá sér undanfarna daga. Í gær sátu formenn aðildarfélaga inna ASÍ á þriggja klukkutíma hita fundi þar sem hart var deilt á vinnubrögð ríkisstjórnarinnar. Niðurstaða fundarins varð þrátt fyrir allt að kjarasamningum yrði ekki sagt upp þrátt fyrir gríðarleg vonbrigði með svik ríkisstjórnar sem kennir sig við félagshyggju. Fulltrúar samninganefnda ASÍ hafa átti fundi með ráðherrum í gær og var stefnt að frekari viðræðum í dag. Ríkisstjórnin hefur til kl.16.00 í dag að koma með svör við kröfum launþega um efndir loforða. Sárust eru svikin varðandi lífeyrissjóðina og sú ótrúlega skammsýni stjórnvalda að skattleggja viðbótarlífeyrissparnað launþega.  Landssamböndin innan ASÍ hafa einnig verið að funda að undanförnu og sent frá sér yfirlýsingar eða ályktanir eitt af öðru. Hér fyrir neðan má nálgast ályktanir og yfirlýsingar frá þeim landssamböndum sem Verk Vest er aðili að.

Ályktun formannafundar SGS, Starfsgreinasambands Íslands.

Yfirlýsing frá LÍV, Landssambandi íslneskra verslunarmanna.

Samþykkt miðstjórnar Samiðnar, Sambands iðnfélaga.

Frekari umfjöllun má einnig nálgast á vef ASÍ.