Það hefur varla farið fram hjá neinum sem kominn er til vits og ára, að gjaldtaka af sjúklingum hækkaði verulega um áramótin, m.a. var tekið upp sérstakt gjald sem fólk þarf að greiða fyrir að vera lagt inn á sjúkrahús. Miðstjórn ASÍ hefur sent frá sér ályktun þar sem þessum hækkunum er mótmælt og hagdeild sambandsins hefur unnið afar fróðlega samantekt um breytingar á gjaldtöku hjá ríkinu um áramótin. Í ályktun miðstjórnar ASÍ er m.a. bent á að þessar hækkanir, eins og aðrar, hafa áhrif þegar verðbólga er mæld og virka þannig til hækkunar á verðtryggðum skuldum heimilanna í landinu. Þannig verður ógæfu íslenskrar alþýðu allt að vopni í upphafi ársins 2009.

...
Meira

Kosningu um framlengingu á kjarasamningi sjómanna í Verkalýðsfélagi Vestfirðinga lauk kl.17:00 þann 30. desember sl. Kynningarfundir um samkomulagið fóru fram dagana 22.desember í skrifstofu félagsins á Ísafirði og 29. desember í húsnæði Fræðslumiðstöðvar Vestfjarða og var fundurinn sendur út um fjarfundarbúnað til Patreksfjarðar.  Á kjörskrá voru 120 sjómenn í Verkalýðsfélagi Vestfirðinga og greiddu 33 atkvæði á kjörfundum eða 27,5% og teljast úrslitin því bindandi.

Já sögðu 21 eða 63.6%

Nei sögðu 12 eða 36,4%

Samningur um framlengingu kjarasamnings með áorðnum breytingum telst því samþykktur með meirihluta greiddra atkvæða og tekur því gildi á félagssvæði Verkalýðsfélags Vestfirðinga frá og með 1. janúar 2009.

Frá og með 1.janúar 2009 koma inn hækkanir á persónuafslætti og sjómannaafslætti. Einnig kemur til framkvæmda hækkun á atvinnuleysisbótum, bæði grunnatvinnuleysisbótum og tekjutengdum.

Þann 1. janúar hækkar persónuafsláttur úr kr.34.034 í 42.205 og nemur hækkunin því  kr.8.171.  Sjómannaafsláttur hækkar úr kr. 874 á dag í kr.987 á dag eða 113 krónu hækkun á dag. 

Hækkun atvinnuleysisbóta sem átti að koma til framkvæmda 1.mars 2009 hefur verið flýtt að skipun félagsmálaráðherra og tekur sú breyting gildi frá og með 1.janúar 2009.  Grunnatvinnuleysisbætur hækka úr kr. 136.036 í kr. 149.536,  og tekjutengdar atvinnuleysisbætur hækka úr kr. 220.279 í kr.242.636.  

Verkalýðsfélag Vestfirðinga hefur staðið fyrir tveimur kynningarfundum um kjarasaminga sjómanna á Vestfjörðum og hafa fundarmenn getað kosið um samninginn að loknum kynningum. Í þessu sambandi er rétt að ítreka að kjörfundur er einnig í dag 29.desember til kl 17:00 og á morgun 30. desember frá kl.08:00 - 17:00 í skrifstofu félagsins á Ísafirði. Sjómenn eru hvattir til að mæta og greiða atkvæði um samninginn. Einnig er hægt að greiða atkvæði um samninginn hjá Halldóri Gunnarssyni deildarformanni á Patreksfirði.  Áformað er að tilkynna úrslit í atkvæðagreiðslunni á gamlársdag.

Verkalýðsfélag Vestfirðinga sendir bestu óskir um gleðileg jól, gott og farsælt ár með þökkum fyrir samstarfið á árinu.

Megi nýtt ár færa ykkur öllum farsæld og frið.

 

Jólakveðja frá Verk -Vest