« 1 af 6 »

Félagið á 3 rúmgóðar íbúðir á 2., 6. og 7. hæð í lyftuhúsi í Ásholti 2, rétt ofan við Hlemm. Íbúðirnar eru eins hvað varðar stærð og herbergjaskipan. Í þeim eru tvö svefnherbergi, stór stofa og borðstofa, eldhús og baðherbergi. Þvottavél er í baðherbergi á 7. hæð. Í íbúðunum er sjónvarp, útvarp og öll venjuleg eldhúsáhöld og borðbúnaður. Allur rúmfatnaður er til staðar, sængur, koddar og lín. Sameiginlegt þvottahús með þvottavél, þurrkara og strauvél er á jarðhæð.

Leiguskilmálar
Íbúðirnar eru leigðar minnst 3 sólarhringa í einu. Leigutakar koma milli kl. 13:00 og 17:00, brottför í síðasta lagi kl. 12:00. Vikuleiga er kr. 19.000. Helgarleiga (föstud. - mánud.) er kr. 14.000, en kr. 3.500 á sólarhring mánud.-föstud.
Skrifstofa félagsins annast úthlutun og útleigu. Lyklar eru afhentir á skrifstofunni á Ísafirði.

Leigutakar verða að nýta sjálfir ásamt fjölskyldum og/eða vinum hús eða íbúðir sem þeir fá úthlutað. Framsal til annarra er óheimilt og getur valdið því að viðkomandi félagsmaður verði útilokaður frá úthlutun framvegis. Það á einnig við ef brotnar eru almennar reglur og skyldur sem leigutakar takast á hendur við leigu orlofsíbúða.

Allt dýrahald er bannað í orlofsbústöðum Verk-Vest. Brot á því varða tafarlausri brottvísun úr húsinu.

Umgengni.

Leigutaki ber ábyrgð á húsinu og öllum tilheyrandi búnaði meðan á dvöl stendur. Ef eitthvað skemmist skal tilkynna það umsjónarmanni eða skrifstofu félagsins strax.

Gangið þrifalega um íbúðina og húsið. Reykingar eru bannaðar í öllum orlofshúsum og íbúðum Verk-Vest. Notið svalirnar.

Tökum tillit hvert til annars. Í fjölbýlishúsum er stutt milli granna og háreysti og umgengni seint að kvöldi eða að næturlagi getur valdið öðrum ónæði.

Við brottför skal ræsta íbúðina vandlega. Ryksuga og þvo öll gólf, á baðherbergi skal þrífa sturtuklefa, salerni og vask. Ganga skal frá og þrífa í eldhúsi, þ.m.t. örbylgjuofn, ísskáp, eldavél og önnur áhöld. Stilla skal ofna á 1-2, loka gluggum og hurðum og taka rafmagnstæki úr sambandi. Ganga skal tryggilega frá rusli og skila því af sér í sorpgeymslu.

Umsjónarmaður fer yfir íbúðina eftir hverja dvalargesti, tekur óhreina tauið og kemur því í þvott og sækir hreint. Hann kannar einnig ástand íbúðarinnar og viðskilnað almennt. Ef ekki er þokkalega þrifið eða aðrar athugasemdir koma fram geta leigjendur átt von á reikningi vegna þess.

Munum að það er sameiginlegt verkefni okkar allra að halda orlofsdvalarstöðum í góðu lagi. Skiljum við íbúðina eins og við viljum taka við henni.

Ef eitthvað vantar í íbúðina eða leigutaki hefur einhverjar athugasemdir, þá vinsamlegast hafið samband við umsjónarmann eða skrifstofu Verk-Vest í síma 456 3190.