Skerðing af þessu tagi leiðir til ótryggara atvinnuástands hjá íbúum byggðarlaga sem byggja nánast allt sitt á vinnslu og veiðum sjávarfangs, fyrir utan að hafa jafnvel bein áhrif á íbúaþróun með neikvæðum hætti.  Þá gegnir Ferjan Baldur einnig lykilhlutverki í samgöngum vegna reksturs framhaldsdeildar á Patreksfirði undir stjórn Framhaldsskóla Snæfellinga í Grundarfirði.

Á meðan ástand vegamála á svæðinu er svo dapurlegt sem raun ber vitni, er einfaldlega ekki hægt að bjóða fólkinu og atvinnulífinu á suðurfjörðunum upp á það að skerða þjónustu Baldurs. Hið skelfilega ástand veganna og fyrirhuguð skerðing á vetrarþjónustu gerir það að verkum að á þá flutningsleið er ekki hægt að treysta.

Leiða má að því líkum í óbreyttri stöðu þá muni fyrirtæki  þurfa að grípa til þeirra neyðarúrræða að draga enn frekar saman í rekstri. Afleiðingarnar yrðu uppsagnir starfsfólks í meiri mæli en áður hefur verið.  Til að koma í veg fyrir slíkt þurfa stýrivextir Seðlabanka að lækka niður í 3 - 5% sem fyrst. Verðtryggingu á húsnæðislánum þarf að frysta tímabundið, eða afnema með öllu.

Verkalýðhreyfingin hefur marg oft bent á hve ómarkvissar og seinvirkar aðgerðir sem gripið hefur verið til af hálfu ríkisvaldsins væru. Í því samhengi er tekið undir ályktun miðstjórnar ASÍ frá 26. ágúst síðast liðinn um greiðsluvanda heimila. Það skilar engu að draga lappirnar í doða og aðgerðarleysi, áræðni og þor til framkvæmda er atvinnu og efnahagslífi okkar nauðsynlegt.

Sparnaður, niðurskurður og aðhaldsaðgerðir eiga ekki að vera einkunarorð þegar byggja þarf upp til framtíðar. Botnfrosið hagkerfi skilar okkur ekki öðru en gjaldþrotahrynu heimila og fyrirtækja. Snúum vörn í sókn með sameiginlegu átaki verkalýðshreyfingarinnar, vinnumarkaðarins og Alþingis."

Fundurinn krefst þess að stjórnvöld geri stórátak í jöfnun raforku- og flutningskostnaðar sem og standa við fyrri hugmyndir um flutning opinberra starfa til landsbyggðarinnar.  Þá verði átak í samgöngumálum Vestfirðinga sett í algjöran forgang, þannig að heilsárstenging suður- og norðursvæðis verði að veruleika sem fyrst.  Í þeim málum eru vestfirskir vegir mörgum áratugum á eftir í uppbyggingu og þróun. Sú tenging mun skjóta styrkari stoðum og efla samvinnu og samstarf í atvinnumálum á norður- og suðursvæði Vestfjarða." 

Samningsaðilar launþega eru hvattir til að hlusta á áherslur hins almenna félagsmanns og hafa þær að leiðarljósi. Verum þess minnug að vilji félagsmanna eru lýðræðisleg vinnubrögð og gagnvirkar upplýsingar, ekki miðstýrð ákvarðanataka fárra einstaklinga án samráðs við grasrótina.

Höfum samstöðu og einingu að leiðarljósi. Látum hræðsluáróður vinnuveitanda ekki villa okkur sýn. Ákvörðun um frestun kjarasamninga verður eingöngu tekin af félagsmönnunum sjálfum en ekki fámennum hópi.  Það er hin lýðræðislega aðferð, forræðishyggja og miðstýring verður að víkja.

Stöndum vörð um réttindi félagsmanna ásamt því að verja gildandi kjarasamninga. Launþegar hafa þegar lagt sitt lóð á vogaskálarnar til þess að svo megi verða."

Til að lægja öldur reiði og óánægju hlýtur krafan um opna og upplýsta rannsókn á atburðum undangenginna vikna og í framhaldinu skýrar leikreglur um starfsemi fjármálafyrirtækja að vera í fyrirrúmi.  Stjórn og trúnaðarráð Verkalýðsfélags Vestfirðinga lýsir algjöru vantrausti á að stjórnendur nýju bankanna skuli vera sama fólkið og hélt áður um stjórnartauma þeirra. Sýnt þykir að sömu aðilar bera stærstu ábyrgð á þeim vanda sem þjóðinni hefur verið komið í.  Þá verði látið af pólitískum skipunum í stjónir seðlabanka og fjármálaeftirlits, og núverandi stjórnendum verði gert að víkja tafarlaust.

Samfélag siðvæðingar er það sem almenningur vill taka þátt í, þar sem auðlindir þjóðarinnar verði að sameign hennar. Þannig næðist sátt um þátttöku landsmanna í því uppbyggingarstarfi sem  framundan er. Við viljum byggja upp samfélag með fjölbreyttu atvinnulífi og góðri menntun fyrir alla. Launþegasamtök í landinu í samvinnu við atvinnurekendur og stjórnvöld verða að stuðla að á Íslandi bresti ekki á með fjölda atvinnuleysi sem síðan gæti leitt af sér fjöldagjaldþrot heimila í landinu. Í því sambandi verður að varast að leggja frekari álögur á heimilin í formi aukinnar skattheimtu. Þess konar aðgerðir ofan á vaxandi atvinnuleysi gæti leitt af sér meiri fólksflótta frá Íslandi en áður hefur þekkst, sérstaklega hjá ungu fólki.

Eitt af forgangsverkefnum er að tryggja atvinnu og stemma stigu við fólksflótta, þar vegur þyngst að verja störf fólksins. Efla þarf samstaf ráðamanna þjóðarinnar og sveitafélaga við launþegasamtök með það að leiðarljósi að verja hag heimilanna fyrir frekari áföllum. Finna þarf leiðir til að koma heimilunum út úr vítahring hárra vaxta og verðtryggingar. Þar er krafa okkar að stjórnvöld tryggi hér sama stöðugleika og sambærileg kjör á húsnæðislánum og almenningi býðst í nágrannalöndunum. Það sé leið til að búa heimilunum öruggt skjól í því gjörningaveðri sem nú gengur yfir efnahagslíf landsmanna.

Endurskoðun kjarasamningsins frá febrúar sl. og samstarf við samtök opinberra starfsmanna um sameiginlega kjarastefnu til næstu ára er mikilvægt úrlausnarefni. Allt tal um þjóðarsátt á þeim nótum sem síðast var gerð hlýtur að vera eitthvað sem launþegasamtökin eiga ekki að taka þátt í nema okkar fólki verði tryggð sanngjarnari afkoma en reyndin varð þá.

Vestfirskt verkafólk tók ekki þátt í góðærisveislunni enda tekjur þess skornar við nögl.  Tölur um neikvæðan hagvöxt bera þess einnig glöggt merki, en Vestfirðir eru nú skilgreindir sem láglaunasvæði.  Ekki er ásættanlegt að Vestfirskt verkafólk þurfi að sópa eftir partí útrásarvíkinga svo ekki sé talað um að þurfa að borga reikninginn fyrir því sem var skrifað hjá partíhöldurum og líka fyrir skemmdirnar.

Fundurinn tekur einnig undir stefnumótun 53. Fjórðungsþings í samgöngumálum, sérstaklega um nauðsyn þess að með tengingu norðan- og sunnanverðra Vestfjarða muni Ísafjarðarbær standa undir nafni sem byggðarkjarni Vestfjarða. Fyrir íbúa, stofnanir og fyrirtæki á norðanverðum Vestfjörðum er brýn nauðsyn að leiðin Ísafjörður - Reykjavík í gegnum Barðastrandasýslu verði heilsársvegur. Þessi vegur yrði að mestu láglendisvegur sem jafnframt tryggði öruggari hringtengingu sveitarfélaga á Vestfjörðum.

Þá fagnar fundurinn hugmyndum starfshóps viðskiptaráðherra um niðurgreiðslu á flutningskostnaði framleiðslufyrirtækja á landsbyggðinni. Sá flutningskostnaður  sem framleiðslufyrirtæki á landsbyggðinni þurfa að búa við skekkir mjög samkeppnishæfni þeirra við framleiðslufyrirtæki á suðvesturhorninu. Verði hugmyndir starfshópsins að veruleika styðja þær við frekari atvinnuuppbyggingu á landsbyggðinni sem og að treysta atvinnuöryggi íbúa landsbyggðarinnar.

"Aðalfundur Verkalýðsfélags Vestfirðinga beinir þeim orðum til Jóhönnu Sigurðardóttur félags- og tryggingarmálaráðherra, að hún standi sérstakan vörð um almenn útlán Íbúðalánasjóðs þannig að sjóðurinn verði áfram eitt heildstætt lánakerfi fyrir alla landsmenn."

Greinagerð.

Ekki er ljóst hvaða tilgangi það á að þjóna hjá ríkisstjórninni að boða óljósar og ótímasettar breytingar á Íbúðalanasjóði eins og staðan í efnahagsmálum þjóðarinnar er um þessar mundir.  Öll óvissa í þeim efnum er einungis fallin til að skapa ótta og villa um fyrir íbúðarkaupendum, sem mega eiga von á hækkun vaxta almennra íbúðalána komi til afnám ríkisábyrgðar á almenn útlán sjóðsins. 

Íbúðalánsjóður hefur staðið af sér fyrri atlögur banka og sparisjóða, sem geystust inn á íbúðalánamarkaðinn með gylliboðum um endurfjármögnun og hærra lánshlutfall til íbúðakaupenda. Þeir íbúðakaupendur sem tóku lán hjá bönkum og sparisjóðum standa nú frammi fyrir þeirri staðreynd að vextir lánanna verði hækkaðir umtalsvert.  Sú aðför að skipulagi og útlánum íbúðalánasjóðs sem nú er verið að gera kemur til með að bitna harðast á íbúðakaupendum á landbyggðinni.

Aðalfundur Verkalýðsfélags Vestfirðinga

Ísafirði 24. maí 2008

"Stjórn Verkalýðsfélags Vestfirðinga gagnrýnir harðlega þá bylgju hækkana sem launþegar hafa þurft að taka á sig að undanförnu. Spyrna þarf við ört hækkandi eldsneytis- og matarverði ásamt  þeim gríðarlegu hækkunum á öðrum nauðsynjum sem dynja á landsmönnum. Það er með öllu óásættanlegt að fyrsti kostur skuli vera að hækka vöruverð og þjónustu til neytenda, mættu aðrir taka þá til fyrirmyndar sem ekki bregða á þessi óyndisráð. Þá eru þau vinnubrögð birgja og heildsala að lauma breytingum á vaxta- og gengismun inn í boðaða hækkun vöruverðs fordæmd harkalega. Ef fram fer sem horfir þá verður verðbólguhraðinn næstu misseri orðinn slíkur að ekki verður við ráðið, og nýumsamdar kjarabætur launþega hverfa með öllu ef ekki verður brugðist strax við vandanum. 

Launþegar gerðu miklar væntingar vegna þeirra kjarabóta sem nýjum kjarasamningi var ætlað að færa þeim. Þær kjarabætur skerðast meir og meir með hverjum deginum sem líður, við óbreytt ástand verður ekki unað. Samstaða launþega, með verkalýðshreyfinguna í fararbroddi, gerir þá skýlausu kröfu að endurskoðun vegna framlengingar kjarasamninga hefjist strax. Reynt verði að vinna að haldbærum langtímalausnum á þeim vanda sem steðjar að launþegum, atvinnurekendum og íslensku efnahagslífi. Þar verða allir að leggjast á eitt um að sá árangur náist að verðbólgu og vöxtum verði komið í viðunandi horf  þannig að umsamdar kjarabætur skili sér til heimilanna í landinu."