Eins og kom fram hér á vefnum hefur staðið yfir kjarasamningsbundið fiskvinnslunámskeið á Flateyri. Því lauk formlega með útskrift föstudaginn 9.desember þegar Fræðslumiðstöð Vestfjarða útskrifaði 20 einstaklinga sem sérhæft fiskvinnslufólk. Fiskvinnslunámskeiðin eru hluti af kjarasamningsbundnu námi fiskvinnslufólks en sú breyting hefur orðið á náminu að það hefur verið fært undir Fræðslumiðstöð atvinnulífsins. Þetta er fyrsta fiskvinnslunámskeiðið þar sem hluti þátttakenda er atvinnulaust fiskvinnslufólk, má því segja að brotið hafi verið blað í sögu þessara námskeiða. En forstöðumaður Fræðslumiðstöðvar Vestfjarða, Smári Haraldsson, sagði við útskriftina að með þessu væru Vestfirðingar enn og aftur í forystu þegar kæmi að útfærslu náms tengdu atvinnulífinu. Þegar hafa tvö fyrirtæki pantað námskeið í byrjun næsta árs, Vísir á Þingeyri og Kampi á Ísafirði. Verkalýðsfélag Vestfirðinga sendir útskriftarnemum árnaðaróskir með áfangann og hvetur þessa einstaklinga til að fylgjast með að launatöxtum verði breytt í samræmi við námið.

Á 100 framkvæmdastjórnarfundi SGS, Starfsgreinasambands Íslands var eftirfarandi ályktun samþykkt samhljóða.

"Framkvæmdastjórn Starfsgreinasambands Íslands harmar að ríkisstjórn Jóhönnu Sigurðardóttur ætli að svíkja loforð um jöfnun lífeyrisréttinda á milli almenna og opinberra lífeyriskerfisins sem gefin voru við undirritun kjarasamninga í vor.

Áformum stjórnvalda um skattlagninu á lífeyrissjóði er harðlega mótmælt, enda munu þau leiða til skerðingar á lífeyrisréttindum á almennum vinnumarkaði og um leið auka frekar á þann ójöfnuð sem er á lífeyrisréttindum á milli almenna og opinbera vinnumarkaðarins. Fyrirhuguð skattlagning snertir eingöngu almennu lífeyrissjóðina þar sem ríkið er skuldbundið bæta opinberu sjóðunum upp skattlagninguna með auknum inngreiðslum sem teknar verða af skattfé almennings.

Þá mótmælir framkvæmdastjórn Starfsgreinasambands Íslands einnig harðlega áformum ríkisstjórnarinnar um að hækka bætur almanna- og atvinnuleysistrygginga helmingi minna en lægstu laun hækka þrátt fyrir skrifleg loforð um að lífeyrisþegar og atvinnulausir skuli njóta hliðstæðra kjarabóta."

Nú fer í hönd einn mesti annatími afgreiðslu fólks í verslunum þegar
jólaösin fer að þyngjast. Í desember eykst álag á verslunar og
afgreislufólki mjög mikið og því vert að hafa í huga nokkur mikilvæg
atriði er varða réttindi þessarra starfsmanna. Þá beinir félagið þeim
tilmælum til verslunar og afgreiðslufólks að halda vel utan um skráningu
vinnu tíma.

Frídagar yfir hátíðarnar eru:
Eftir kl. 12 á aðfangadag ( stórhátíðardagur)
Jóladagur (stórhátíðardagur)
Annar í jólum (almennur frídagur)
Eftir kl. 12 á gamlársdag ( stórhátíðardagur )
Nýjarsdagur (stórhátíðardagur)


Ekki er vinnuskylda
á þessum dögum og skulu launþegar halda sínum dagvinnulaunum óskertum. Auk þess
má minna á að fyrsta vinnudag eftir jól skal dagvinna í verslunum hefjast kl.
10.

...
Meira

Í morgun hófst fiskvinnslunámskeið á vegum Verk Vest og Fræðslumiðstöðvar Vestfjarða. Námskeiðið sem haldið er á Flateyri er hluti af kjarasamingsbundnu námi fiskvinnslufólks. Um er að ræða 40 stunda grunnnámskeið og að námskeiði loknu útskrifast þátttakendur sem sérhæft fiskvinnslufólk og munu launataxti hækka í samræmi við það. Námskeiðið á Flateyri fer að mestu fram á íslensku en túlkað verður yfir á pólsku þar sem megin þorri þátttakenda eru pólskumælandi. Stærstur hluti kennslunnar verður í höndum Nönnu Báru Maríasdóttur frá Miðstöð símennturnar á Suðurnesjum og Fisktækniskóla Suðurnesja í Grindavík. Námskeiðslok verða föstudaginn 9.desember.

Dagbókin 2012 fyrir félagsmenn Verk Vest er nú komin í afgreiðslu félagsins á Ísafirði. Dagbókinni verður komið í dreifingu allra næstu daga til deildarformanna á félagssvæðinu og ætti því að verða aðgengileg á flestum vinnustöðum innan skamms.